Հանրային հեռուստաընկերությունում է պահպանվում հանրապետության ամենամեծ հեռուստատեսային արխիվը: Նյութերի պահպանման և թվայնացման հարցը տարիներ շարունակ եղել է հեռուստաընկերության առանցքային խնդիրներից մեկը: Տարբեր կրիչների, մասնավորապես՝ կինոժապավենների, տեսաերիզների, տեսասկավառակների, կոշտ սկավառակների վրա գտնվում էր ազգային նշանակություն ունեցող, հարուստ տեղեկատվական ժառանգություն, որը մշակման, կանոնակարգման ու թվայնացման լուրջ անհրաժեշտություն ուներ:
Սկսած 2014 թվականից` հեռուստաընկերությունն արդեն նախաձեռնել էր արխիվային նյութերի քիմիական մշակման, ինչպես նաև տվյալների համակարգված բազայի ու որոնման համակարգի ձևավորման գործընթացը, որը հիմք էր դառնալու հետագայում «Ոսկե ֆոնդի» թվայնացման միջոցով արխիվային նյութերի երկարաժամկետ պահպանման ու հանրության լայն շերտերին ներկայացնելու համար:
Այդ նպատակով, Հայաստանի հանրային հեռուստատեսության արխիվային ձայնագրությունները թվայնացնելու համար նախատեսված սարքավորումների բարելավման ծրագրի շրջանակում, 2017 թ. մարտի 30-ին Հայաստանի Հանրապետության և Ճապոնիայի կառավարությունների միջև ստորագրվել է համաձայնագիր։
Նույն թվականի ապրիլից Հանրային հեռուստաընկերությունը, ճապոնական «JICA» ընկերության հետ համագործակցելով, սկսել է տեխնիկական վերազինման գործընթացը, որի արդյունքում 2019 թ. հեռուստաընկերության արխիվը ձեռք է բերել անհրաժեշտ սարքավորումներ. մեկնարկել են ժապավենների թվայնացման, պատկերի մասնագիտական մշակման, արխիվային նյութերի մոնտաժման, բազմաշերտ որոնման հնարավորությամբ՝ էլեկտրոնային ֆիլմադարան ստեղծելու աշխատանքները:
Ծրագրի արդյունավետ իրականացման շնորհիվ այժմ Հանրային հեռուստաընկերության արխիվը հագեցած է ժամանակակից ստանդարտներին համապատասխան անհրաժեշտ տեխնիկայով, իսկ թվայնացվող նյութերի ծավալն օրեցօր ավելանում է:
Մեկ տարվա ընթացքում Հանրային հեռուստաընկերության արխիվի ծառայության կողմից միջինում՝
- Թվայնացվում, մշակվում և գունամշակվում է՝ 60 ժամ կինոժապավեն
- Թվայնացվում և մշակվում է՝ 1500 ժամ տեսաերիզներ
- Արխիվացվում և լրացվում են մետատվյալներ՝ 6000 անուն նյութ
Օգտագործվում են ժապավենների մաքրման, վերականգնման, վերամշակման ու մոնտաժման համար նախատեսված լավագույն սարքավորումները:
Մշակվել է թվայնացման հատուկ ռազմավարություն, որն իրականացվում է բարձր որակավորում ունեցող լավագույն մասնագետների կողմից՝ «Դա Վինչի» համակարգի միջոցով:
Կառուցվել է ժապավենների համար հատուկ պահպանման տարածք, որտեղ տեղակայված են արխիվում առկա բոլոր ֆիլմերը, հաղորդաշարերը և կարևոր նշանակության պատմական այլ տեսագրություններ:
Հեռուստաընկերությունում գործում է «Թվային արխիվը», որտեղ ըստ տարեգրության տեսակավորվում ու պահպանվում են արդեն թվայնացված նյութերը:
