Հանրային հեռուստաընկերությունը, կատարելով իր առջև դրված խնդիրները, հեռուստադիտողի համար փորձում է ապահովել բազմաժանր բովանդակություն, եթերացանցը դարձնել հետաքրքիր ու գունեղ յուրաքանչյուր հեռուստադիտողի համար: Այս ամենը իրագործելու բարդ գործառույթներն իրականացնում է հեռուստաընկերության գլխավոր պրոդյուսերը:  

Տիգրան Վիրաբյանն իր մասնագիտական գործունեության ընթացքում ձգտել է առավելագույնս նպաստել Հայաստանում մշակութային կյանքի զարգացմանը և առերեսվել ոլորտի մարտահրավերներին:

2000-2004 թթ. սովորել է Երևանի թատրոնի և կինոյի պետական ինստիտուտի դերասանական արվեստի բաժնում։ 2004-2006 թթ. ծառայել է ՀՀ Զինված ուժերում և ստացել լեյտենանտի զինվորական կոչում: Ծառայությունից վերադառնալով՝ շարունակել է ուսումը ԵԹԿՊԻ արվեստի կառավարման («Սոցիալ-մշակութային գործունեություն») բաժնում:

2007-2016 թթ. աշխատելով Վ. Աճեմյանի անվան պետական դրամատիկական թատրոնում որպես պրոդյուսեր, այնուհետև 2016 թվականից՝ որպես տնօրեն՝ իր ստեղծարար մտքի, նվիրվածության և  կազմակերպչական փայլուն ունակությունների շնորհիվ լուրջ բեկում է մտցրել Գյումրու թատերային կյանքում:

2018 թ. հոկտեմբերի 29-ին Երևանի ավագանու նիստում նշանակվել է Երևանի քաղաքապետի տեղակալ:

2020 թ. դեկտեմբերից Տիգրան Վիրաբյանը Հանրային հեռուստաընկերության գործադիր տնօրենի տեղակալն է և հեռուստաընկերության գլխավոր պրոդյուսերը: