Հեռուստատեսության այն մասնագետը, որը կարողանում է միաժամանակ տեսնել, թե ինչ է տեղի ունենում նկարահանման հրապարակի բոլոր անկյուններում, ռեժիսորն է: Հարություն Սեմերջյանը ոչ միայն կարողանում է տեսնել ողջ պատկերը, այլև նկատել նույնիսկ այնպիսի մանրուքներ, որոնք տեսանելի չեն սովորական աչքի համար:

Մասնագիտությամբ ռեժիսոր Հարություն Սեմերջյանն իր աշխատանքային գործունեությունը սկսել է 1990 թվականին Հայաստանի պետհեռուստառադիոյում, որտեղ եղել է կինոֆոնդի բաժնի ավագ տեխնիկ: 1991 թվականից եղել է ռեժիսորի ասիստենտ, սկզբում՝ հեռուստաընկերության ուսումնական, այնուհետև` սպորտի խմբագրությունում:

1992 թվականից եղել է «Մայրաքաղաք» լրատվական ծառայության, 1995 թվականից՝ «Բարև» ծրագրի ռեժիսորը:

1998-1999 թթ․ ծառայել է ՀՀ ՊՆ լրատվության և քարոզչության վարչությունում։

2000-2010 թթ․ վերապատրաստվել է ռուսական Առաջին ալիքում (Անդրեյ Մալախով, թոք շոուներ), Ուկրաինայի պետական հեռուստաալիքում (Եվրոպայի լիգայի ֆուտբոլային հանդիպման հեռարձակում), Ինտերնյուսում (վավերագրական ֆիլմերի դասընթացներ), ինչպես նաև, Ֆրանսիայի դեսպանատան նախաձեռնությամբ, տարածաշրջանի ռեժիսորական խմբերի հետ մասնակցել է Final Cut ծրագրի դասավանդմանը։

«Շարմ» ընկերության հետ համատեղ իրականացրել է «100 տարբերակ» և «Մենք գիտենք, որ դու գիտես», «ՀայQ» նախագծերը՝ որպես բեմադրող ռեժիսոր։

Եղել է Առաջին հայկական թոք շոու «Բաց նախագծի», «Կինկոմ» նախագծի ռեժիսորն ու ղեկավարը, ինչպես նաև Հանրային հեռուստաընկերության եթերում երկար տարիներ ցուցադրված «Երգ երգոց», «Երկու աստղ», «Բենեֆիս» երաժշտական նախագծերի և «Հայ ասպետ» հեռուստախաղի ռեժիսորը։

2009-2010 թթ. համագործակցել է «Արմենիա» հեռուստաընկերության հետ և եղել «32 ատամ», «3 պատ», «Նոստալջի» հաղորդումների ռեժիսորը:

Եղել է այնպիսի կարևոր մշակութային նշանակություն ունեցող միջոցառումների ռեժիսոր, ինչպիսիք են Սերժ Թանկյանի (2010), Շառլ Ազնավուրի (2015) մենահամերգները։

2013 թ. եղել է շարժական հեռուստակայանի բեմադրող ռեժիսոր:

2013-2016 թթ. Երևանի պետական համալսարանի «Մասս մեդիա» գիտակրթական կենտրոնի մագիստրատուրայում դասավանդել է հեռուստառեժիսուրա:

2014 թվականից Հանրային հեռուստաընկերության գլխավոր ռեժիսորն է:

Հարություն Սեմերջյանը Առաջին ալիքի «Հաղթանակ կերտողները» (Հայաստան, Ռուսաստան, Ուկրաինա) նախագծի հեղինակն ու ռեժիսորն է, ինչպես նաև «Դեպի «Եվրատեսիլ»», «Գուշակիր մեղեդին», «Լավ երեկո», «Մեր ֆուտբոլը» նախագծերի և Տիգրան Մանսուրյանին նվիրված հեռուստաֆիլմերի բեմադրող ռեժիսորն է։

2017 թ. հրավիրվել է ԱՄՆ՝ որպես ռեժիսոր իրականացնելու Համահայկական բարեգործական հեռուստամարաթոնի ուղիղ հեռարձակումը։

Առաջին ալիքի՝ 2021 թվականից մեկնարկած Մեդիա ակադեմիայի ռեժիսորական կուրսի պատասխանատուն է։

Հարություն Սեմերջյանը Հայաստանի Հանրային հեռուստաընկերության կողմից նկարահանվող բոլոր պետական արարողակարգերի, տոնական և հիշատակի միջոցառումների, զորահանդեսների, ֆուտբոլային հանդիպումների, պետական այրերի հարցազրույցների նկարահանման և ուղիղ հեռարձակման ռեժիսորն է։