Մատենադարան. Ձեռագրերի գաղտնիքները

Հաղորդաշարը պատմում է հայկական ամենամեծ ձեռագրապահոցում գտնվող հնագույն ձեռագրերի ու գրքերի ստեղծման, գոյատևման պատմությունը: Յուրաքանչյուր ֆիլմն առանձին ներկայացնում է կոնկրետ ձեռագիր և նրա անցած ուղին: Այդ մասին պատմում են գիտակներն ու փորձագետները: Նրանց խոսքն ու պատմական տարբեր հայտնի փաստեր համադրելով՝ ուրվագծվում է այն միակ ու ճշմարիտ ուղին, որով անցել է տվյալ գիրը՝ Մատենադարանում հայտնվելուց առաջ: Հաղորդաշարի ընթացքում լուսաբանվում են տարբեր ասպարեզներում տեղ գտած գրեր՝ իրավական, բժշկական, աստղագիտական և այլն: Առանձնահատուկ ուշադրության են արժանացել գրի ստեղծման դարաշրջանի հրամայականները, գրի նշանակությունն ու ունեցած դերն իր ժամանակաշրջանում: «Մատենադարան. Ձեռագրերի գաղտնիքները» հաղորդաշարի նպատակներից մեկն է հասարակության լայն շերտերի շրջանակներում առաջացնել այն հետաքրքրությունը, որին իրապես արժանի է Մատենադարանը: Հաղորդումը վարում է Ստեփան Զաքարյանը:

 

Ծնվել է 1957-ին:

1978-ին ավարտել է Խ. Աբովյանի անվան մանկավարժական ինստիտուտի կուլտուրայի ֆակուլտետի ռեժիսորական բաժինը:

1979-81 թթ. ռեժիսորի ասիստենտ է աշխատել հեռուստաֆիլմերի «Երևան» ստուդիայում:

1981-83 թթ. աշխատել է «Պիոներ» ամսագրի խմբագրությունում որպես գրական աշխատող:

1983-ին աշխատանքի է անցել Հեռուստատեսության և ռադիոյի պետական կոմիտեում, նախ՝ որպես խմբագիր, հետո՝ բաժնի վարիչ, գործակալության պետի տեղակալ, ապա՝ գլխավոր խմբագիր:

1987-ին Մոսկվայում ավարտել է հեռուստատեսության և ռադիոյի աշխատակիցների վերապատրաստման դասընթացը, 1993-ին նշանակվել  Հեռուստատեսության և ռադիոյի պետական կոմիտեի նախագահի տեղակալ, իսկ 1996-ին`  Հայաստանի ռադիոընկերության գլխավոր տնօրեն:

1997-98 թթ. աշխատել է Երևանի քաղաքապետարանում որպես մշակույթի, երիտասարդության հարցերի և սպորտի վարչության պետ, 1999-07 թթ. եղել է ՀՀ Ազգային ժողովի պատգամավոր:

2007-ից առ այսօր Հանրային հեռուստառադիոընկերության խորհրդի անդամ է:

2013-14 թթ. «Հայաստանի առեղծվածներ» ֆիլմաշարի հեղինակ և վարողն էր:

2015-16 թթ.՝ «Մատենադարան. Ձեռագրերի գաղտնիքները» ֆիլմաշարի: