Իր 70-ամյակին ընդառաջ Հայաստանի հանրային հեռուստաընկերությունը ներկայացնում է իր հոբելյանական 70-րդ եթերաշրջանի նոր բրենդինգը: Թեմատիկ ձևավորման առանցքում Հանրայինի հեռուստաընտանիքի տարբերանշաններից առանձնացված շեղանկյունն է, որը խորհրդանշում է հեռուստադիտողներին միավորող և դեպի աշխարհ բացվող պատուհան-էկրանը: Գունային լուծումները ևս պատահական չեն. արդեն հարազատ դարձած կապույտին ու մոխրագույնին միայն այս եթերաշրջանում միացել է ոսկեգույնը՝ խորհրդանշելով հայկական հեռուստատեսության 70-րդ հոբելյանը: Նոր բրենդինգի եռաչափ ձևավորմամբ Առաջին ալիքը մեկնարկել է իր աշնանային եթերաշրջանը, ուր հոբելյանական տարին նշանավորող խորհրդանիշին գումարվել են եռաչափ թեմատիկ տարրերը և գունային համադրությունները: Թեմատիկ տարրերից են նաև բրենդինգն ամբողջացնող հատուկ տառատեսակն ու թվականները: Հոբելյանական եթերաշրջանի նոր բրենդինգով Հանրային հեռուստաընկերությունը ներկայացնելու է նաև մի շարք բրենդավորված ապրանքներ և տարին նշանավորող հատուկ նախագծեր:
